АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «АБАЛАЦКАЯ»
Кондак 1
Избра́нной предве́чным Царе́м в на́ше ве́рных спасе́ние небесе́ и земли́ Цари́це, благода́рственныя похвалы́ прино́сим Ти, Богоро́дице! Ты же, я́ко иму́щая держа́ву непобеди́мую и милосе́рдие неизрече́нное, от вся́ких нас бед свободи́ и вся блага́я нам да́руй, да зове́м Ти:
Ра́дуйся, Ма́ти Де́во, всепе́тая христиа́н похвало́.
Икос 1
Арха́нгели и а́нгели пою́т Тебе́, Де́ве чи́стой, немо́лчныя пе́сни на небеси́. Мы же, гре́шнии, на земли́, прекло́ньше коле́на душ и серде́ц на́ших пред пречи́стым Твои́м о́бразом, со слеза́ми умиле́ния бре́нными уста́ми вопие́м Ти:
Ра́дуйся, засту́пнице на́ша усе́рдная; ра́дуйся, Ма́ти на́ша премилосе́рдная.
Ра́дуйся, сла́во на́ша непреходя́щая; ра́дуйся, бога́тство на́ше неистощи́мое.
Ра́дуйся, помо́щнице на́ша непрело́жная; ра́дуйся, покрови́тельнице на́ша при́сная.
Ра́дуйся, ра́досте на́ша, от вся́кия скве́рны пло́ти и ду́ха нас очища́ющая; ра́дуйся, цели́тельнице на́ша, боле́зней душе́вных и теле́сных нас избавля́ющая.
Ра́дуйся, похвало́ на́ша, ра́достей духо́вных нас не лиша́ющая; ра́дуйся, Влады́чице на́ша, по́мощию Твое́ю неду́ги на́ша исцеля́ющая.
Ра́дуйся, прибе́жище на́ше, от враго́в ви́димых и неви́димых нас покрыва́ющая; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 2
Ви́дящи в трикра́тных виде́ниих боголюби́вая вдови́ца Мари́я всечестна́го лица́ Твоего́, Пресвята́я Де́во, изображе́ние, у́жасом вели́ким одержи́ма, убоя́ся пове́дати о чуде́сных виде́ниих свои́х лю́дем, в се́рдци же свое́м из глубины́ души́ взыва́ше Бо́гу: Аллилу́иа.
Икос 2
Ра́зум, неразумева́емый челове́ческими по́мыслы, и́щущи разуме́ти в чу́дном явле́нии пречи́стаго Твоего́, Богома́ти, о́браза, блаже́нная Мари́я но́ваго удосто́ися виде́ния, в не́мже вели́кий святи́тель Никола́й гро́зно повеле́ ей возвести́ти ви́денное; она́ же со стра́хом и тре́петом всем пове́да та́йну виде́ния своего́ и всех научи́ взыва́ти к Богоро́дице:
Ра́дуйся, всех Зижди́теля в Твои́х ложесна́х носи́вшая; ра́дуйся, Бо́га пло́тию ро́ждшая, ми́ру Спаси́теля.
Ра́дуйся, в рождестве́ де́вство нетле́нно сохра́ншая; ра́дуйся, на земли́ а́нгельски пожи́вшая.
Ра́дуйся, Бо́га с челове́ки примири́вшая; ра́дуйся, святы́х всех пресвяте́йшая.
Ра́дуйся, Де́во Пресвята́я, ди́вно яви́вшая нам о́браз Свой; ра́дуйся, Благода́тная, в явле́нии о́браза Своего́ милосе́рдие нам явля́ющая.
Ра́дуйся, о всех чту́щих о́браз Твой святы́й промышля́ющая; ра́дуйся, всем моля́щимся Тебе́ пред святы́м о́бразом Твои́м по ме́ре ве́ры спасе́ние подава́ющая.
Ра́дуйся, чудесы́ Твоего́ о́браза умы́ на́ша к го́рнему ми́ру возводя́щая; ра́дуйся, святая́ святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 3
Си́лу Бо́жию и́щуще уве́дети благове́рнии лю́дие Тобо́льстии в ди́вных явле́ниих о́браза Твоего́, Богома́ти, собра́шася вку́пе с архиере́ем свои́м Некта́рием, да уве́рятся, я́ко милосе́рдие Цари́цы Небе́сныя восхоте́ посети́ти и в стране́ на́шей всех хотя́щих улучи́ти спасе́ние; уве́рившеся же и ра́дующеся ра́достию вели́кою, воспе́ша Бо́гу: Аллилу́иа.
Икос 3
Иму́ще всеусе́рдно жела́ние стяжа́ти сокро́вище небе́сное, святы́й лик Твой, Богоро́дице, вси единоду́шно возжела́ша пе́рвее свои́ми рука́ми устро́ити на ме́́сте явле́ния но́вую в честь Зна́мения Бо́жия Ма́тере це́рковь, ю́же и воздвиго́ша, со всем усе́рдием воспева́юще Цари́це Небе́сной:
Ра́дуйся, а́нгельское вели́кое удивле́ние; ра́дуйся, праоте́ческое ди́вное утеше́ние.
Ра́дуйся, проро́ческая высо́кая про́поведь; ра́дуйся, апо́стольская пресла́вная похвало́.
Ра́дуйся, святи́телей изря́дное украше́ние; ра́дуйся, му́чеников кре́пкое утвержде́ние.
Ра́дуйся, преподо́бных спаси́тельное наставле́ние; ра́дуйся, по́стников неизнемога́ющее воздержа́ние.
Ра́дуйся, де́вствующих чистото́ и сла́во; ра́дуйся, отце́в и матере́й ти́хое весе́лие.
Ра́дуйся, всех правосла́вных христиа́н удобре́ние; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 4
Бу́ря помышле́ний сумни́тельных в ра́достную тишину́ преложи́ся, егда́ ви́девшая в виде́ниих о́браз Пречи́стыя Де́вы Богоро́дицы указа́ бы́ти его́ подо́бие Зна́мения Новгоро́дскаго, то́чию с предстоя́щима святи́телем Никола́ем и Мари́ею Еги́петскою; те́мже и возопи́ша вси Бо́гу: Аллилу́иа.
Икос 4
Слы́шав Евфи́мий, разсла́бленный те́лом, но не ду́хом, от не́коего ста́рца Па́вла, е́же бы написа́ти явле́нную ико́ну в но́вую це́рковь, созида́вшуюся по повеле́нию Бо́жию на Абала́ке, потща́ся вда́ти де́ло сие́ иску́сному в жи́вописании перводиа́кону Тобо́льския ка́федры Матфе́ю; егда́ же о́браз сей писа́ше, боля́щий по ма́лу целя́шеся и Богоро́дице усе́рдно поя́ше:
Ра́дуйся, Цари́це Небе́сная, явле́нием честны́я Твоея́ ико́ны нас обра́довавшая; ра́дуйся, Ма́ти Бо́жия, чуде́сным целе́нием от нея́ нас удивля́ющая.
Ра́дуйся, стране́ на́шей све́тлое просвеще́ние; ра́дуйся, земли́ на́шей несокруши́мое огражде́ние.
Ра́дуйся, по во́дам пла́вающим тишино́; ра́дуйся, обурева́емым небу́рное приста́нище.
Ра́дуйся, путеше́ствующим ле́гкое прехожде́ние; ра́дуйся, блужда́ющим милосе́рдная наста́внице.
Ра́дуйся, тружда́ющимся благо́е поко́ище; ра́дуйся, обремене́нным ти́хое прибе́жище.
Ра́дуйся, в беда́х су́щим ско́рая засту́пнице; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 5
Боготе́чней звезде́, приве́дшей иногда́ волхво́в к со́лнцу пра́вды Христу́ Бо́гу на́шему, подо́бно бысть явле́ние ико́ны Твоея́, боже́ственная Де́во, в преде́лех на́ших; ви́дяще бо и моля́щеся пред не́ю, пра́отцы на́ши из Тебе́ познава́ху Сы́на Твоего́, Спа́са на́шего, мы же науча́емся усе́рднее пе́ти Ему́: Аллилу́иа.
Икос 5
Ви́девше лю́дие тобо́льстии честну́ю ико́ну Бо́жия Ма́тере, яви́вшую чуде́сное исцеле́ние усе́рдствовавшему написа́ти ю, я́ко боже́ственное сокро́вище, прия́ша ю и, я́ко многосве́тлый свети́льник, поста́виша в но́вом хра́ме, и́ми созда́нном, ра́дующеся и вопию́ще к Богоро́дице:
Ра́дуйся, светоза́рное свети́ло, страну́ на́шу озаря́ющее; ра́дуйся, спасе́ние душа́м на́шим устроя́ющая.
Ра́дуйся, небе́сным све́том сердца́ на́ша просвеща́ющая; ра́дуйся, мир, тишину́ и благоде́нствие нам явля́ющая.
Ра́дуйся, боля́щим духо́вно и теле́сно здра́вие подава́ющая; ра́дуйся, оби́димых Свое́ю честно́ю ри́зою покрыва́ющая.
Ра́дуйся, безнаде́жных изве́стное наде́яние; ра́дуйся, младе́нцев ра́зум просвеща́ющая.
Ра́дуйся, вдови́ц и сиро́т корми́тельнице; ра́дуйся, наги́х одея́ние и пле́нных избавле́ние.
Ра́дуйся, прося́щим по́мощи ско́рая помо́щнице; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 6
Пропове́дницы неле́стнии вели́каго милосе́рдия Твоего́, Влады́чице, к лю́дем бы́ша вси прия́вшии чуде́сная исцеле́ния от святы́я ико́ны Твоея́; вси же слы́шавшии и ви́девшии благода́тныя то́ки, излива́ющияся оби́льно от Тебе́ на стра́ждующих и бе́дствующих, вку́пе с ни́ми ра́достно воспева́ху Бо́гу: Аллилу́иа.
Икос 6
Возсия́ благода́ть от о́браза Твоего́, Де́во Чи́стая, я́ко со́лнце пресве́тлое, в преде́лех на́ших, луча́ми чуде́с, истека́ющих от него́, град наш и вся гра́ды и стра́ны не то́чию земли́ Сиби́рския, но и Росси́йския озаря́ющая; сего́ ра́ди, недоумева́юще изрещи́ вели́чие чуде́с, от ико́ны Твоея́ бы́вших, Богоро́дице, во умиле́нии се́рдца ве́рою и любо́вию вопие́м Ти:
Ра́дуйся, че́рною не́мощию одержи́мых исцеля́ющая; ра́дуйся, боля́щих оча́ми уздравля́ющая.
Ра́дуйся, паду́чих боле́зней избавля́ющая; ра́дуйся, слепы́м зре́ние отверза́ющая.
Ра́дуйся, злы́я де́моны от люде́й отгоня́ющая; ра́дуйся, бесну́ющимся здра́вие подава́ющая.
Ра́дуйся, разсла́бленных от одра́ воздвиза́ющая; ра́дуйся, немы́м язы́к и глаго́лание возвраща́ющая.
Ра́дуйся, от всех лю́тых неду́гов врачу́ющая; ра́дуйся, в со́ниих и виде́ниих стра́ждущим явля́ющаяся.
Ра́дуйся, от вся́ких напа́стей чуде́сно свобожда́ющая; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 7
Хотя́й просла́вити святу́ю ико́ну Твою́, Богоро́дице Де́во, Сын Твой и Бог наш Госпо́дь Иису́с Христо́с, воо́чию всех излия́ от нея́ неисчерпа́емое чуде́с мо́ре, в не́мже вси погружа́ющиися с ве́рою и упова́нием прие́млют благода́ть исцеле́ний и, благодаря́ще Го́спода, со стра́хом и любо́вию умиле́нно вопию́т Ему́: Аллилу́иа.
Икос 7
Но́вая и пресла́вная чудеса́ благода́ти Твоея́, Богоро́дице, яви́ нам Госпо́дь, егда́ свята́я ико́на Твоя́ носи́ма бе по гра́дом и ве́сем страны́ на́шея; мно́зи бо ве́рующии внеза́пу исцеля́хуся от разнообра́зных неисце́льных неду́гов, и неве́рнии к ве́ре обраща́хуся, со удивле́нием, умиле́нием и любо́вию воспева́юще Тебе́:
Ра́дуйся, вся́кия боле́зни исцеля́ющая; ра́дуйся, вся неду́ги отгоня́ющая.
Ра́дуйся, любо́вию серафи́мскою присногоря́щая; ра́дуйся, ду́ши и сердца́ на́ша любо́вию боже́ственною воспламеня́ющая.
Ра́дуйся, огнь Божества́ в Себе́ вмести́вшая; ра́дуйся, пла́мя страсте́й на́ших изменя́ющая.
Ра́дуйся, от огня́ грехо́внаго ве́рующих в Тя соблюда́ющая; ра́дуйся, от огня́ гее́нского лю́бящих Тя избавля́ющая.
Ра́дуйся, от запале́ния о́гненнаго жили́ща на́ша сохраня́ющая; ра́дуйся, све́та Твоего́ заря́ми мрак неве́дения н́ашего разгоня́ющая.
Ра́дуйся, те́плая на́ша засту́пнице и усе́рдная к Бо́гу о нас моли́твеннице; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 8
Стра́нное виде́ние честны́я ико́ны Богома́тере, свы́ше явле́нное, с предстоя́щими святи́телем Никола́ем и Мари́ею Еги́петскою, разуме́вше, устрани́мся, муж́ие и же́ны, ми́ра су́етнаго, ум к небе́сным возводя́ще; сего́ бо ра́ди и даде́ся нам чу́дная ико́на Богоро́дицы, да взира́юще на ню, го́рняя му́дрствуем, а не земна́я, вопию́ще к Бо́гу: Аллилу́иа.
Икос 8
Вся еси́ в вы́шних, но и ни́жних не оставля́еши, Богоро́дице Де́во; чудесы́ бо Твои́ми, от святы́я ико́ны Твоея́, я́ко от жива́го и незави́стнаго исто́чника, изливающи́мися, при́сно нас просвеща́еши, ве́рою к Тебе́ притека́ющих и зову́щих такова́я:
Ра́дуйся, ни́щих ду́хом неистощи́мое бога́тство и ми́лостей бе́здно; ра́дуйся, Ма́ти чадолюби́вая, печа́льных незри́мое утеше́ние.
Ра́дуйся, голуби́це кро́ткая, ти́хая и незло́бивая; ра́дуйся, го́рлице благогла́сная, ненави́димых та́йное успокое́ние.
Ра́дуйся, гре́шников спасе́ние и к Бо́гу присвое́ние; ра́дуйся, правове́рных всех тве́рдое огражде́ние.
Ра́дуйся, неви́димое наде́ющимся на Тя поможе́ние и заступле́ние; ра́дуйся, а́нгельский у́ме, при́сно зря́щий Бо́га.
Ра́дуйся, светоза́рная звездо́ у́мнаго Со́лнца; ра́дуйся, херуви́мов и серафи́мов сла́внейшая.
Ра́дуйся, арха́нгелов и а́нгелов честне́йшая; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 9
Вся страна́ на́ша богохрани́мая, ми́лостьми Твои́ми, Богома́ти, облагода́тствованная, иму́щи ико́ну твою́ чудотво́рную в щит и огражде́ние от враго́в ви́димых и неви́димых, незри́мою Твое́ю по́мощию побежда́ет вся супоста́ты своя́, Бо́гу же в ра́дости се́рдца благогове́йно вопие́т: Аллилу́иа.
Икос 9
Вити́йство на́ше пе́сненное, я́ко де́тское немо́тствование, не довле́ет к изглаго́ланию всех чуде́с и благодея́ний, Тобо́ю, Влады́чице, явле́нных и при́сно явля́емых нам от ди́вныя ико́ны Твоея́; сего́ ра́ди недоумева́юще благохвали́ти Тя по достоя́нию, со смире́нием взыва́ем Ти:
Ра́дуйся, сла́вящих Тя всегда́ прославля́ющая; ра́дуйся, от огня́ гра́ды и ве́си на́ши хожде́нием ико́ны Твоея́ сохраня́ющая.
Ра́дуйся, хра́мы и до́мы на́ша ико́ною Твое́ю благода́тно посеща́ющая; ра́дуйся, моли́твы моля́щихся Тебе́ к Бо́гу вознося́щая.
Ра́дуйся, рыда́ний и воздыха́ний на́ших никогда́же отмета́ющая; ра́дуйся, прише́ствием Твоея́ ико́ны ра́дости на́ша усугубля́ющая.
Ра́дуйся, вся ско́рби на́ша и го́рькия бе́ды ею услажда́ющая; ра́дуйся, уныва́ющих Твои́м человеколю́бием ободря́ющая.
Ра́дуйся, покланя́ющимся явле́нной Твое́й ико́не ра́дость и здра́вие подава́ющая; ра́дуйся, ду́ши ве́рных милосе́рдием Твои́м умиля́ющая.
Ра́дуйся, ра́досте на́ша, ико́ною Твое́ю свято́ю при́сно нас утеша́ющая; ра́дуйся, свята́я святы́х большая.
Ра́дуйся, Ма́ти Де́во, всепе́тая христиа́н похвало́.
Кондак 10
Спасти́ хотя́й род челове́ческий от ве́чнаго муче́ния и да́ти ему́ Ца́рство Небе́сное, человеколюби́вый Госпо́дь дарова́ нам, гре́шным, Ма́терь Свою́ в по́мощь, покро́в и защище́ние; бу́ди же нам, о Всеблага́я, помо́щница, засту́пница и руководи́тельница во всем житии́ на́шем, и во исхо́де и по кончи́не на́шей не оста́ви нас, уми́льно вопию́щих: Аллилу́иа.
Икос 10
Стена́ еси́ вои́стину необори́мая, Богоро́дице Де́во, всем к Тебе́ прибега́ющим; никто́же бо притека́яй к Тебе́ отхо́дит тощь. Те́мже, ущедря́еми ми́лостию Твое́ю, во умиле́нии души́ мо́лим Тя: покры́й, заступи́ и спаси́ всех нас, безпо́мощных, от вся́ких бед, искуше́ний и озлобле́ний, Тебе́ с любо́вию взыва́ющих:
Ра́дуйся, кре́пкая защи́то возложи́вших на Тя упова́ние; ра́дуйся, вои́нству спобора́ющая.
Ра́дуйся, судия́м немздоприе́мным споспе́шнице; ра́дуйся, наста́вников и детоводи́телей вразумле́ние.
Ра́дуйся, позна́ния и́стины чи́стое зерца́ло; ра́дуйся, сохране́ния ве́ры кре́пкое забра́ло.
Ра́дуйся, всеблага́я уте́шительнице несча́стных; ра́дуйся, сирота́м бесприю́тным покрови́тельнице.
Ра́дуйся, всех дете́й благословля́ющая; ра́дуйся, вся́кую ю́ность к добру́ направля́ющая.
Ра́дуйся, всех во́зрастных в свято́й жи́зни укрепля́ющая; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 11
Пе́ния и моле́ния на́ша, пред свято́ю и чудотво́рною ико́ною Твое́ю Тебе́ возноси́мая, прии́мши, благосе́рдная Влады́чице, заступи́, спаси́, поми́луй и сохрани́ нас от вся́каго зла́го обстоя́ния, да ти́хое и безмо́лвное житие́ под кро́вом Твои́м поживе́м во вся́ком благоче́стии и чистоте́, из глубины́ души́ умиле́нно воспева́юще Бо́гу: Аллилу́иа.
Икос 11
Светоприе́мную свещу́ све́та божестве́ннаго, я́ко Богоро́дицу и Ма́терь Све́та невече́рняго, разумева́юще и почита́юще Тя, Пречи́стая, ка́ко возмо́жем изрещи́ благода́тная Твоя́ озаре́ния, при́сно теку́щая от ико́ны Твоея́, я́ко от со́лнца лучеза́рнаго? Оба́че озаре́ния Твоего́ ми́лостиваго, Всеблага́я, ищу́ще, дерза́ем воспева́ти Тебе́:
Ра́дуйся, заре́ незаходи́мая, све́том ве́чным нас осиява́ющая; ра́дуйся, луно́, от Со́лнца пра́вды нас облистава́ющая.
Ра́дуйся, свети́льниче, на све́щнице превы́сшем поста́вленный; ра́дуйся, свеще́ неугаси́мая огня́ невеще́ственнаго.
Ра́дуйся, Ма́ти Све́та и́стиннаго, благочести́вых ду́ши просвеща́ющая; ра́дуйся, свет ра́йския жи́зни нам источа́ющая.
Ра́дуйся, при́сно блажа́щих Тя пресве́тло ублажа́ющая; ра́дуйся, усе́рдно моля́щихся Тебе́ све́том благода́ти озаря́ющая.
Ра́дуйся, вся́кую ста́рость о́бразом святы́я жи́зни соде́ловающая; ра́дуйся, тьму, в не́йже язы́чницы, неве́рующии, еретицы́ и раско́льницы пребыва́ют, истребля́ющая.
Ра́дуйся, всех гре́шников све́том Твои́м просвеща́ющая и к покая́нию приводя́щая; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 12
Благода́ти зало́г да́вшая нам святу́ю ико́ну Твою́, Ма́ти Бо́га Вы́шняго, испроси́ нам у Небе́снаго Влады́ки, Сы́на Твоего́ и Бо́га на́шего, благода́ть Свята́го Ду́ха, воздви́гни нас из глубины́ грехо́вныя, просвети́ серде́чная о́чи на́ша к зре́нию спасе́ния, оживотвори́ сердца́ на́ша ду́хом благоче́стия и стра́ха Бо́жия, ду́хом чистоты́ и пра́вды, ду́хом любве́ и милосе́рдия, да всегда́ пое́м Бо́гу: Аллилу́иа.
Икос 12
Пою́ще Твоя́ дре́вняя и но́вая ми́лости и чудеса́, Богороди́тельнице, хва́лим Тя вси, я́ко тве́рдую и наде́жную предста́тельницу на́шу, со умиле́нием поклоня́емся Тебе́, вы́ну моля́щейся о нас и благотворя́щей нам; ве́руем бо и упова́ем, я́ко испро́сиши и пода́си нам вся блага́я и спаси́тельная, вре́менная и ве́чная, воспева́ющим Ти:
Ра́дуйся, непосты́дное упова́ние в животе́, во исхо́де и по кончи́не на́шей; ра́дуйся, упова́ющим на Тя ми́рен коне́ц живота́ сего́ подаю́щая.
Ра́дуйся, в День Су́дный на́ша наде́ждо и защище́ние; ра́дуйся, Судии́ Пра́веднаго умоле́ние.
Ра́дуйся, всех ка́ющихся гре́шников прибе́жище и заступле́ние; ра́дуйся, всех пра́ведных сла́во и утеше́ние.
Ра́дуйся, ра́дость вы́ну Тебе́ принося́щих радости ве́чныя сподобля́ющая; ра́дуйся, сле́зная моле́ния на́ша ми́лостивно прие́млющая.
Ра́дуйся, покро́вом Твои́м от враго́в ви́димых нас покрыва́ющая; ра́дуйся, всех нас, гре́шных, ко спасе́нию и восприя́тию благ ве́чных наставля́ющая.
Ра́дуйся, покланя́ющимся ико́не Твое́й и Тя на по́мощь призыва́ющим ско́ро помога́ющая; ра́дуйся, свята́я святы́х бо́льшая.
Ра́дуйся, Ма́ти Де́во, всепе́тая христиа́н похвало́.
Кондак 13
О всеблага́я Ма́ти Де́во Богоро́дице, при́сно благоде́ющая нам во святе́й ико́не Твое́й, ны́нешнее прие́мши Тебе́ еди́ней прикла́дное приноше́ние, от вся́ких нас бед, напа́стей и ско́рбей вре́менных и ве́чных изба́ви и сподо́би нас, рабо́в Твои́х, в селе́ниих ра́йских водвори́тися, да во вся ве́ки пое́м: Аллилу́иа.
Этот кондак читается трижды, затем 1-й икос «Арха́нгели и а́нгели…» и 1-й кондак «Избра́нной предве́чным Царе́м…».
Молитва
О Пресвята́я Влады́чице моя́ Богоро́дице, милосе́рдия су́щи исто́чник, покро́ве, упова́ние и прибе́жище христиа́н! Тебе́, всеси́льней предста́тельнице и спору́чнице покая́ния и спасе́ния моего́, аз, гре́шный раб Твой, вруча́ю ду́шу и те́ло мое́, вхо́ды и исхо́ды моя́, ве́ру и жи́тельство мое́, кончи́ну и число́ дней мои́х, глаго́лы и помышле́ния моя́, дела́ и начина́ния моя́; Ты же, ми́лостивая Ма́ти Бо́жия, мною руково́дствуй, покры́вай, соблюда́й и спаса́й мя от всех вра́жеских ко́зней невреди́мо, да немо́лчно, до после́дняго издыха́ния моего́, взыва́ю Ти: Ра́дуйся, Неве́сто неневе́стная! Ра́дуйся, свята́я святы́х бо́льшая! Пресвята́я Богоро́дице, спаси́ мя! Ами́нь!
Тропарь, глас 4
К Богоро́дице приле́жно ны́не притеце́м, гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны милосе́рдовавши, потщи́ся, погиба́ем от мно́жества прегреше́ний, не отврати́ Твоя́ рабы́ тщи, Тя бо и еди́ну наде́жду и́мамы.
Кондак, глас 6
Не и́мамы ины́я по́мощи, не и́мамы ины́я наде́жды, ра́зве Тебе́, Пречи́стая Де́во. Ты нам помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.
Величание
Велича́ем Тя, Пресвята́я Де́во, богоизбра́нная Отрокови́це, и чтим о́браз Твой святы́й, и́мже то́чиши исцеле́ния всем с ве́рою притека́ющим.