АКАФИСТ СВЯТОЙ ВЕЛИКОМУЧЕНИЦЕ ИРИНЕ
Кондак 1
Избранней Богом от идолослужительнаго рода на просвещение языков, богомудрей и преславней невесте Христовой Ирине, благодарственное и хвалебное пение воспоем ти, молитвенницы твои, святая и многострадальная великомученице Ирино. Ты же, имущи дерзновение ко Господу, от всяких нас бед и скорбей свободи, да зовем ти:
Радуйся, святая мученице Ирино, невеста Христова преславная.
Икос 1
Ангельскую честную и вселюбезную чистоту, святая мученице Ирино, непорочно сохранила еси, со Ангелы купно сподобилася еси Богу Трисвятую песнь воспевати на небеси, услыши нас, тебе верно поющих на земли:
Радуйся, отроковице, Богом Отцем предуставленная быти сообразна в страдании образу Сына Его; радуйся, Сыном Божиим из тьмы в благодатный свет призванная.
Радуйся, яко приимше Духа Святаго, в отрочестве идолослужение отринула еси; радуйся, земнаго обручника паче Небеснаго знати не восхотела еси.
Радуйся, убелившая ризы твоя в крови Агнчей на земли; радуйся, в Небеснем Чертозе со Христом царствуеши на Небеси.
Радуйся, Ирино, невесто Христова преславная.
Кондак 2
Видящи себе святая мученице Ирино на столпе велелепнем от отца поставлену, помышляше себе, о промысле Божием разумевая, о творчестем создании небеси и земли и бездушных идолех, умне восходящи от тьмы ко свету, от идолослужения к истинному Богу, Емуже вернии воспевают: Аллилуиа.
Икос 2
Божией премудрости вместилище ты была еси, непорочная отроковице, измлада от любви к миру и всего, яже в мире, отвергшаяся. Всею душею Твоею Христа Жениха возлюбила еси, Емуже равноапостольно послужила еси, среди неверных проповедавши Истиннаго Бога. Сего ради таковому твоему разуму дивящеся, глаголем:
Радуйся, премудрая евангельская дево, правой веры и дел благих исполненная; радуйся, паче мудрецов мира сего премудростию напоенная.
Радуйся, о проповедании веры богоглаголивыя уста апостольския; радуйся, христианских дев украшение.
Радуйся, оружием Креста Христова демоны отгоняющая; радуйся, верная ко Господу о нашем спасении молитвеннице.
Радуйся, Ирино, невесто Христова преславная.
Кондак 3
Сила Божия дадеся тебе, святая мученице Ирино, во святем крещении, егда пресвитер Тимофей, просветив тя, даде тебе послание святых Апостол, сим призывая тя на великое апостольское служение. Ты же, исполнившись Духа премудрости, пред лицем царя, отца твоего Ликиния, все златые идолы безбоязненно сокрушила еси и, яко раба Господня, едину православную веру в Бога Отца и Сына и Святаго Духа исповедала еси, зовуще Ему: Аллилуиа.
Икос 3
Имущи, святая Ирино, свыше данную тебе премудрость и силу, егда многажды понуждаема от Ликиния, отца твоего, поклонитися идолом, именуя тя Пенелопою, но ты рекла ему: «Не извращай моего имене, Ирина аз есмь, нареченная Ангелом в видении, и тако наименовася во святем крещении. Не поклонюся бесом, имже вы поклоняетесь; аз Единому Богу, Создателю моему, поклоняюся и яко Жениха моего люблю». За такое убо дерзновение приими от нас похвалу сию:
Радуйся, столпе веры, жития христианскаго утверждение; радуйся, детище, Богом просвещенное во святем крещении.
Радуйся, орлице Царя Небеснаго, Богом дарованная на просвещение языков; радуйся, в стране царствования отца твоего идольскаго служения искоренительнице.
Радуйся, яко подвиг твой многострадальный предвозвестили голубь, орел и вран, принесши ти маслину, венец и змия; радуйся, яко предрек тебе Апелиан учитель: маслина - твое добронравие, венец - венец славы, а змий - враг, гласит страдания.
Радуйся, Ирино, невесто Христова преславная.
Кондак 4
Бури тяжких искушений воздвигл на тя враг души спасения, егда отец повеле тя поврещи свирепым коням на глумление и удов раздробление. Но егда ты помолися, свирепейший конь, отрешившись, оторва Ликинию руку и топташе его. Тебя же человеческим гласом славною мученицею нарекл есть. Ты же, разрешена от уз и неврежденна, воскресила еси отца своего во имя Христа Сына Божия. Он же, со множеством народа, уверовавше, воззва к Богу: Аллилуиа.
Икос 4
Слышав от тебе злочестивый царь Седекия словеса разумна о вере Христовой, распылашася на тя злобою; паче же егда рекла ему: «Не сяду с сонмом суетным и с законопреступниками не вниду, готова аз есмь всяческая мучения претерпети и не пощажу плоти моея за Христа, Господа моего». И вверже тя в глубину рва, идеже гады ядовиты. И тамо пребысть десять дний невредимо со Ангелом, хранящим тя. Видящи вси сия тобою чудодеемая, славим имя твое, взывающе ти:
Радуйся, младая страстотерпица, за мужественное исповедание веры много пострадавшая; радуйся, агнице кроткая, идольския суетныя лести обличительнице.
Радуйся, яко тобою посрамися лукавый враг, видя себе побежденным; радуйся, о тебе бо радуются вся небесныя силы, видя побеждающу лютых мучителей.
Радуйся, твоими подвигами царей нечестивых к Богу приведшая; радуйся, многострадальная дщи немилостиваго царя Ликиния.
Радуйся, Ирино, невесто Христова преславная.
Кондак 5
Богосветлой звезде подобна была еси, мученице Ирино, множество племен и языков ко спасению приведшая. Три идолоязыческия страны со епархами и клевретами просветила еси. Тяжкие страдания от мучителей Седекии и Саваха претерпела еси, трикраты на пилах железных претреваемая и в жерновах раздробляемая. О великомученице! Твоих страданий небесная стихия, гром и молния, не стерпеша и нечестивыя поразиша. Люде же увероваша, со трепетом Бога прославляя и поя Ему: Аллилуиа.
Икос 5
Видевше царь Савах, яко сила Божия, в тебе чудодеющи, поборает и посрамляет его безумныя веления, ополчи сто тысящ воинов на град Магеддон. Ты же молилася Господу о еже поразити слепотою супостаты и по ослеплении их, паки умолила Всевышняго даровати им зрение. Сия радости мы исполненнии, глаголем тебе сице:
Радуйся, святая Ирино, тобою бо свет Христов возсия в странах языческих; радуйся, богопротивных царей и воинов дивное вразумление.
Радуйся, града Магеддона преславное защищение; радуйся, веры православныя исповедание и света Евангельскаго сияние.
Радуйся, закона Божия верная хранительнице; радуйся, многострадальная Богоневесто, от лютаго Седекии многажды палимая.
Радуйся, Ирино, невесто Христова преславная.
Кондак 6
Проповедником Богоносным Апостолом поревновала еси, пред мучительми безбоязненно Христа Бога проповедала еси, Егоже ради тяжкия раны, узы и темницу претерпела еси; во огни на костре в медных пещех палима была еси, но сохранил тя Ангел Господень во славу Божию, и мы взываем Богу Всемогущему: Аллилуиа.
Икос 6
Возсиял есть в сердцы твоем свет богоразумия, свет Господа Иисуса Христа. Той, яко Жених твой возлюбленный, укрепляше тя, страдающу, сопричастницу Его страданий, егда вонзеша тебе в пяты острое гвоздие и обуздавши, яко осля, пять поприщ насильно ведоша тя, ты же в страншем страдании своем моляся Богу, тысящи народа просветила еси; беззаконных же мучителей, разверзшеюся землею поглощенных, посрамила еси; мы же вопием ти:
Радуйся, Ирино, рабо Господня и молитвеннице наша; радуйся, голубице кроткая, язвы ради Господа носившая.
Радуйся, от гвоздиных, кровию истекающих ран, Ангелом исцеленная; радуйся, яко тебе Господь дарова силу и мудрость побеждати ставших противу лица истины.
Радуйся, яко тобою от многих ран и болезней кающиися исцеляются; радуйся, яко твоею молитвою бесы прогоняются и прокаженнии очищаются.
Радуйся, Ирино, невесто Христова преславная.
Кондак 7
Восхоте безумный мучитель тя, святая мученице Ирино, ко идолослужению преклонити, увещевая тя пожрети идолом жертву, ты же, крестом оградившися, возгласи: «Аз приношу жертву Богу Всевышнему, Иже обладает жизнию и смертию всех людий. Вразумись же, царю, прельщенный сатаною!» Освирепевший мучитель, скрежеща зубами, повеле в медных пещех трикраты палити тя, но Ангел Господень, пламень остудив, сохранил тя невредну на славу славящим Бога песнию: Аллилуиа.
Икос 7
Новую показа ярость безчеловечия злобный Ваводан, егда тебя, святая мученице Ирино, повеле оковати тя путами железными и жжети варом и туком кипящим. Ты же, Божия страдалице, бе в пламени горяща, со Ангелом отрешившим от решетцы и охлаждающим тя, Бога славила. Изумившись мучитель таковому чуду, паде к стопам твоим, прося прощения и святых молитв за всю страну, обратившуюся ко Господу. Мы же с любовию взываем к тебе:
Радуйся, многострадальная мученице, за Христову Церковь много претерпевшая; радуйся, святая девице, Христа ради в пещех и на кострех палимая.
Радуйся, за спасение людей на раскаленней решетце жегомая; радуйся, великая страстотерпице, Христа ради тяжко мучимая.
Радуйся, яко твоими страданиями мног народ к признанию Бога истиннаго привела еси; радуйся, врагов Церкви победительнице и в бедах наших скорая помощнице.
Радуйся, Ирино, невесто Христова преславная.
Кондак 8
Странная и страшная страдания святыя мученицы видевше, вернии удивишася, како младая отроковица, суще в юном телеси, мужественно за Христа муки претерпевает, да и мы, исполнишеся умиления, благодарно возопиим Богу: Аллилуиа.
Икос 8
Весь сладчайший Иисус сладость тебе бысть, мученице Ирино, ты же горькия муки и тяжкая истязания за Христа и спасение людий от седми мучителей претерпела еси, и яко агница от нечестиваго Савория мечем усечена и погребена была еси, послежде из мертвых возстала еси с райскою ветвию в руках, и в Месемврии к царю явилася еси на вразумление и посрамление богохульников. Со страхом к твоим ногам паде цареубийца, взывая: «Велик Бог христианский!» Просвети и нас, святая Ирино, да зовем ти:
Радуйся, святая равноапостольная Ирино, просветительница стран языческих; радуйся, реко исполненная благодати Божией.
Радуйся, боговозлюбленная ластовице, из небожителей возванная на спасение богохульных и отверженных; радуйся, преславная мученице, многия богопротивныя просветившая.
Радуйся, яко силою Божиею демонстии коварства упразднила еси; радуйся, блаженная страстотерпице, райскую ветвь от Христа приимшая.
Радуйся, Ирино, невесто Христова преславная.
Кондак 9
Вся небесныя силы возрадовашася, восхваляя Бога, даровавшаго тебе таковое мужество и непоколебимую твердость побеждати во брани душепагубных аспидов. Ты бо, укрепляемая силою Божиею, в тысящах языки просвещая, радостно воспевая Богу: Аллилуиа.
Икос 9
Витии многовещаннии риторскими своими языки не возмогут изрещи твоих болезненных страданий и мученических подвигов, яже за Христа претерпела еси. Кто может исчести твоя безчисленная страдания, кия содрогают нас, поющих тебе:
Радуйся, чудодейственное зрелище Ангелом и человеком; радуйся, яко твоим терпением мучителей удивила еси.
Радуйся, кровь свою за Христа Жениха твоего источила еси; радуйся, учеников похвало и верных радование.
Радуйся, лозо плодовитая сада Иисусова; радуйся, доброплодная ветвь винограда Христова.
Радуйся, Ирино, невесто Христова преславная.
Кондак 10
Спасти восхотевши души, во тьме идолослужения погибающия, боголюбивая мученице Ирино, ты, ревнуя о Господе, якоже Илиа, силою Божиею идолы сокруши, бесы прогони, мучителей обличи и посрами. Богу же победную песнь непрестанно воспевала еси: Аллилуиа.
Икос 10
Стена крепка и непоколебима во исповедании православныя веры пребыла еси; не пощаде бо сладкоцветущей юности твоея, презрела еси вся царская достояния отца своего. Возжелаше чрез мученическую смерть уневеститися Христу и с Ним быти в Ангельстем ликостоянии. Мы же, поминающе твоя подвиги и страдания, ублажаем тя сице:
Радуйся, течение мученическаго пути добре скончавшая; радуйся, житием твоим равноапостольским Господу послужившая.
Радуйся, силою свыше на брань с сопротивными препоясанная; радуйся, верным христианом крепкое заступление.
Радуйся, безпомощным заступнице, сирот покровительнице; радуйся, мучеников радование, девственников славо.
Радуйся, Ирино, невесто Христова преславная.
Кондак 11
Пение наше хвалебное по достоянию воспевати недоумевает ум наш, святая мученице Ирино, ты бо подражала еси распятому Агнцу Христу и положила еси душу свою за други своя, ибо больше сия любве никтоже имать. Обаче мы вси, благодарни суще, поем Богу: Аллилуиа.
Икос 11
Светозарный светильник истиннаго света сущим на земли ты являешися, богоизбранная отроковице, просвещаеши сердца верных, исцеляеши недужных и прокаженных, притекающих к тебе с любовию, разслабленным и слепорожденным здравие подаеши, благодарящим тя тако:
Радуйся, о спасении грешных сильная ходатаице; радуйся, обидимых заступнице, злочестивых поборающая.
Радуйся, сосуде благ небесных; радуйся, златая кадильнице, фимиам молитвы о нас Богу приносящая.
Радуйся, сокровище даров Божиих неиждиваемое; радуйся, яко тебе Господь Царство свое даровал есть.
Радуйся, Ирино, невесто Христова преславная.
Кондак 12
Благодать тебе дана, яко Апостолом, слово Божие грешному миру вещати, омраченныя от идолослужения отвращати и всем в подвизех земных помогати. О достославная рабо Господня, много потрудившаяся за род христианский, молися за нас ко Всемилостивому Богу, Спасителю нашему, да сподобит и нас в сем и в будущем веце Бога в Троице прославляти: Аллилуиа.
Икос 12
Воспеваем твоя славныя подвиги, почитаем страдания твоя, хвалим долготерпение, ублажаем святую твою кончину, славим твое в немощном телеси непобедимое мужество, имже попрала еси вся мудрования мира сего. В память твоих подвигов и страданий приими от нас хвалебное пение сие:
Радуйся, от девственных ликов в чертог небесный введенная; радуйся, от мученических полков под венец славы во гласе радования провождаемая.
Радуйся, от небожителей досточудное о Господе приимшая целование; радуйся, яко награда твоя радость вечная во светлости святых.
Радуйся, яко тобою от нечаянныя смерти уповаем сохранитися; радуйся, твоим заступлением Царствия Божия чаем сподобитися.
Радуйся, Ирино, невесто Христова преславная.
Кондак 13
О преславная и всехвальная святая мученице Ирино! Приими от нас сие малое хвалебное пение и не престани молитися о нас ко Господу Богу, да избавит нас от враг видимых и невидимых и твоим заступлением сподобит нас вечнаго Царствия, идеже вкупе с тобою и всеми святыми чаем воспевати Богу: Аллилуиа.
Этот кондак читается трижды, затем 1-й икос «Ангельскую честную…» и 1-й кондак «Избранней Богом…».
Молитва
О многострадальная и преславная Ирино, невесто Христова всехвальная, угоднице Божия! Предстоящи у Престола Пресвятыя Троицы и наслаждающися неизреченнаго блаженства, призри убо милостивно на нас, приносящих ти хвалебное пение сие, испроси нам милость, отпущение грехов у Преблагаго Господа, вемы бо, воистину вемы, яко вся, елико восхощеши, испросити у Него можеши. Темже убо смиренно припадаем к тебе и просим: умилостиви Владыку неба и земли, да подаст нам дух твоей ревности ко хранению святых Его заповедей, яко да возможем земное поприще в добродетельном житии проводити, райских селений унаследовати и тамо с тобою и всеми святыми прославляти Отца и Сына и Святаго Духа во веки веков. Аминь.
Тропарь, глас 4
Агница Твоя, Иисусе, Ирина зовет велиим гласом: Тебе, Женише мой, люблю, и, Тебе ищущи, страдальчествую, и сраспинаюся, и спогребаюся Крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но, яко жертву непопрочную приими мя, с любовию пожершуюся Тебе. Тоя молитвами, яко Милостив, спаси души наша.
Кондак, глас 4
Девства добротами преиспещренна, дево, страдальчеством была еси краснейшая, Ирино, кровьми твоими истекшими обагрена, прелесть же низложившая безбожия. Сего ради и прияла еси почести победы рукою Создателя твоего.