Божественные Страсти Христовы

Канон Божественным Страстем Христовым, глас 6.

Песнь 1

Ирмос: Волною морскою скрывшаго древле, гонителя мучителя, под землею скрыша спасенных отроцы; но мы яко отроковицы, Господеви поим, славно бо прославися.

Припев: Слава страстем Твоим, Господи.

Приклонил еси колене моляся, Емуже покланяется всякое колено небесных, земных и преисподних. Приклонися к молению моему и услыши мя, якоже Отец молящася Тя услыша.

Отче, в молении глаголал еси, да Тебе истиннаго Сына покажеши, на раны готов есмь, аще и единаго зла не сотворих; мене, Иисусе мой, многа зла сотворша, многих избави мучений.

В поте лица твоего хлеб твой снеси, рекл еси падшему человеку, темже, яко вторый Адам, егда молился еси, пот крове изливашеся из пречистаго тела Твоего: брашно бо Твое волю Отчу творити. Ни едину убо заповедь Твою сотворшаго, Иисусе Христе, потом крове Твоея каплющим омый мя.

Богородичен: Не ктому земля проклята есть, Кровию бо Сына Твоего благословляется, Земле Благословенная, Пречистая Дево, воздвигни мя, прах и пепел, на славословие Христа, Бога нашего.

Песнь 3

Ирмос: Тебе на водах повесившаго всю землю неодержимо, тварь видевши на лобнем висима, ужасом многим содрогашеся, несть свят, разве Тебе, Господи, взывающи.

Отягчени быша сном апостоли, егда отшел еси от очию их на молитву в вертограде Гефсиманстем; лениваго мя и унылаго на Твое поклонение воздвигни.

Яко истинный Пастырь, видев волка Иуду грядуща, Аз есмь, друже, глаголал еси ученику лукавому, к покаянию наставляя падшаго. Мене, всегда согрешающа и николиже в чувство приходящаго, направи, Господи мой, на путь правый и от челюстей мысленнаго волка силою Твоею избави.

Со оружием и дрекольми яко на разбойника приходят, Егоже, яко жертву нескверну, в церкви искати подобаше; о моих гресех жертву приносимую Тебе, Господи, не презри.

Богородичен: Коснувся уха усеченнаго, исцели раба архиереова Сын Твой, Врач душ и телес, вся моя душевныя и телесныя, Дево, исцели болезни, Целителя рождшая.

Седален

Не отвещал еси ничтоже власть на Тебе мневшему имети, гордым противляяйся, но многою лжею безстудных утружден, молчиши, да мя многоглаголания избавиши и вся терпети научиши.

Песнь 4

Ирмос: На Кресте Твое Божественное истощание провидя Аввакум ужасся, ворияше: Ты сильных пресекл еси державу, Блаже, приобщаяся сущим во аде, яко Всесилен.

Не отвещал еси словесе безстудному Иродови, сынови погибели, усекнувшему уже Иоанна, предтечу и глас Твой; добраго ответа при кончине моей сподоби мя, Христе.

Знамения искаше Ирод чудеснаго, не разумея велия чуда, яко Бог твари предстоит; знаменай мя светом лица Твоего, Христе мой, и даждь веселие сердцу моему болезненному.

Закрываху лице Твое биющие, Наньже херувими зрети не могут, крилами закрывающеся, покрый мя Твоим заступлением.

Богородичен: Изменися лице Твое, Дево, егда узрела еси Сына Твоего яко злодея ведома от иудеев. Многое воистину долготерпение Твое, Сыне и Боже Мой, с воздыханием рекла еси.

Песнь 5

Ирмос: К Тебе утренюю, милосердия ради Себе истощившему непреложно и до страстей безстрастно преклоньшемуся, Слове Божий, мир подаждь ми падшему, Человеколюбче.

Земля, подножие ног Твоих, израсти на главу Твою терние, Иисусе мой. Изыдите, дщери иерусалимския, и зрите Царя Славы в венце терновнем, имже венча Его неблагодарный род еврейск.

Лживи сынове человечестии в мерилех: Тебе, всем вся Сущаго, тридесятию сребренников оцениша и село крове купиша, Кровь Твою излиявше, Еюже испери ризы моя, яже по крещении и обещании покаяния оскверних.

Повинутися подобаше Богу, а не иудеом, судие безумный, и не осуждати на смерть Владыку и Судию всяческих. Мене, повинувшася скверным страстем, к покаянию настави, Господи, да не в смерть осужден буду.

Богородичен: Заклинаете Богом Живым Бога Живаго, пребезумнии, но небо и земля отвещают, яко Бог есть, сия пострадавый, и Сын Мой, Дева матерски вещаше.

Песнь 6

Ирмос: Ят бысть, но не удержан в персех китовых Иона: Твой бо образ нося, Страдавшаго, и погребению давшагося, яко от чертога от зверя изыде; приглашаше же кустодии, хранящии суетная и ложная, милость сию оставили есте.

Изшел еси, Иисусе, нося Крест Твой, да якоже Авель от Каина, от иудеев постраждеши, изыди и ныне и взыщи мене заблуждшаго.

Грядеши якоже Исаак истинный, на рамо Твое Крест восприемь, да на нем Жертву о многих гресех принесеши Отцу в воню благоухания.

Виде Иаков лествицу утверждену до небес: се есть Крест Твой, имже возведи ум мой от нижних к горним обителем.

Богородичен: Не плачитеся Мене неповинна, дщери иерусалимския, не плачи Мене, Марие, Мати Моя: вскоре бо возрадуешися, егда востану и прославлюся.

Поклонение пяти язвам Христовым

Иисусе мой сладчайший!

Покланяюся пречистей, пресвятей и животворящей язве Твоей, яже в десней Твоей руце, и молю Тя, Господа моего, ея ради сподоби мя одесную Тебе стати.

Покланяюся пречистей, пресвятей и животворящей язве Твоей, яже в шуией Твоей руце, и молю Тя, Господа моего, ея ради от части шуия избави мя.

Покланяюся пречистей, пресвятей и животворящей язве Твоей, яже в десней твоей нозе, и молю Тя, Господа моего, ея ради настави мя на путь правый покаяния.

Покланяюся пречистей, пресвятей и животворящей язве Твоей, яже в шуией Твоей нозе, и молю Тя, Господа моего, ея ради от всякого пути лукаваго возбрани ногам моим.

Покланяюся пречистей, пресвятей и животворящей язве Твоей, яже в пречистых ребрах Твоих, и молю Тя, Господа моего, ея ради сокруши окаменение жестокаго сердца моего, порази е страхом Твоим святым, и уязви любовию Твоею, да Тебе, Господа моего, возлюблю всем сердцем моим, всею душею, всею крепостию и всем помышлением моим, и даждь ми, до кончины живота моего, всегда поминати спасительныя страсти Твоя, и покланятися им и победную песнь Тебе сице воспевати.

Песнь 7

Ирмос: Неизреченное чудо, в пещи избавивый преподобныя отроки из пламене, во гробе мертв бездыханен полагается, во спасение нас поющих: Избавителю Боже, благословен еси.

Истинный Ты еси Давид, восприяв бо Крест, яко Псалтирь красен, на гору Голгофскую возшел еси, да гнева Бога Отца нас свободиши поющих: благословен еси, Агнче Божий, во веки, сотворивый вечное мирови избавление.

Яко добрый дому Отца Твоего строитель, Христе Боже, свещник Крест Твой взем, на нем Сам яко светило возсиял еси мирови, да поем Тебе: благословен, Агнче Божий, во веки, сотворивый вечное миру избавление.

Яко кадило в воню благоухания, от растерзания Плоти Твоея, Кровь Богу Отцу принесл еси, да приведеши мене к Нему поюща: благословен еси, Агнче Божий, во веки, сотворивый мирови вечное избавление.

Богородичен: Егда узрела еси на Кресте Христа, Сына Твоего, Егоже безсеменно родила еси, Чистая, удивилася еси неизреченному Его долготерпению: темже Тя с Ним прославляем.

Песнь 8

Ирмос: Ужаснися, бояся, небо, и да подвижатся основания земли: се бо, в мертвецех вменяется в вышних Живый, и во гроб мал странноприемлется. Егоже отроцы благословите, священницы воспойте, людие превозносите во вся веки.

Се есть Сын Твой возлюбленный, Боже Отче, Егоже крещаема от Иоанна и преобразующася на Фаворе, послушайте, рекл еси; послушай ныне Его жаждуща моего спасения, Емуже, мене ради умершему, пою: искупленнии Кровию Его вси языцы и вся племена, Господа пойте и превозностите Его во веки.

Се есть Сын Твой, Боже Отче, Егоже послана уничижиша, яко землю желанную, не яша веры словесем Его, досаждением и мукою испыташа; аз же зову: роди родов, искупленнии Кровию Его, Господа пойте и превозносите Его во веки.

Се есть Сын Твой, Боже Отче, Иже рожденный не име места во обители: живущь на земли, друг мытарем и грешником и хульник наречеся, на смерть поносную осудися, да мене, греховною тяготою обремененна, в небесных селениих упокоит, поюща: вся внутренняя моя, Господа пойте и превозносите Его во веки.

Богородичен: Се есть Соломон на Своем Престоле, Се Архиерей на Своем Олтари, Се есть Вождь, даяй оружие непобедимое, Се есть Сын Твой, Дево, и Сын Божий, Егоже Отец мене ради не пощаде, но на смерть предаде, да Ему покланяяся пою: вси от века праведнии и грешнии искупленнии Кровию Его, Господа пойте и превозносите Его во веки.

Песнь 9

Ирмос: Не рыдай Мене, Мати, зрящи во гробе, Егоже во чреве без семене зачала еси Сына: востану бо и прославлюся, и вознесу со славою непрестанно яко Бог, верою и любовию Тя величающия.

Вем, кто виновен смерти Твоея на Голгофе: аз, Господи, аз невоздержанием распях Тя, но не постави мне греха сего кающемуся.

Не ктому Херувим хранит врат Едемских, се бо, на древе живот мой Ты повешен еси, Христе. О, любве Твоя неизглаголанная! Научи мя достойно благодарити Тя.

Имаши надписание, Христе мой: Иисус Назарянин, Царь Иудейский. Свидетельство сие есть ко Отцу, яко добре волю Его сотворил еси, в книги животныя напиши мя, молю Ти ся.

Богородичен: Не остави Мене едину, печали исполнену, но вскоре утеши Мя, Утешение Мое, Дева рече. Аз же что воздам Тебе, Иисусе мой? Вниди в сердце мое, да не ктому аз, но Ты во мне живеши, и аз в Тебе.

Светилен

Чертог Твой вижду, Спасе мой, украшенный, и одежды не имам, да вниду в онь, просвети одеяние души моея, Светодавче, и спаси мя.