Икона Божией Матери "Воспитание"

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ВОСПИТАНИЕ»

(второй)

Кондак 1

Взбранной Воеводе и благой Воспитательнице рода христианскаго, яко избавльшеся от злых, благодарственная восписуем Ти, раби Твои, но, яко имущая державу непобедимую, от всяких бед чада моя свободи, да со слезами зову Ти:

Воспитай, Владычице, чада моя достойна Небеснаго Царствия и наследники вечных благ сотвори я.

Икос 1

Ангела с Небесе послати чадом моим исходатайствуй, Пресвятая, у Сына Твоего и Бога, якоже и Тебе послан бысть хранитель прекрепкий Гавриил Архангел, и сподоби мя взывати Тебе сице:

Воспитай чада моя, во еже быти им земным Ангелом; воспитай чада моя, во еже явитися им небесным человеком.

Воспитай чада моя, во еже быти им Твоим рабом; воспитай чада моя, во еже нарещися им другом Сына Твоего.

Воспитай чада моя, да любят Тебе всем сердцем своим и всем помышлением; воспитай чада моя совершенна, яко совершен Отец наш Небесный.

Воспитай чада моя выну зовуща Тебе: Радуйся, Благодатная, Господь с Тобою; воспитай чада моя присно взывающа: Боже, милостив буди мне грешному.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 2

Видящи мое матернее моление о чадех моих, к Тебе бо единей прибегаю, возьми я под Свой честный и милосердный покров, да воззовут Богу: Аллилуиа.

Икос 2

Разум чадом моим посли, како добре Ти послужити, и исполни сердца их небесныя премудрости. Подаждь ю едину возлюбити, земная же паче презрети, и не возбрани устом моим вопияти Ти таковая:

Воспитай чада моя, питающи я млеком сокровенныя премудрости Божия; воспитай чада моя, да взыскуют ю во всем житии своем.

Воспитай чада моя мудра, яко змии, и проста, яко голуби; воспитай чада моя имуща разум на добрая и не имуща на грех.

Воспитай чада моя премудра противу козней диавольских; воспитай чада моя устрояюща мудре житие свое по образу святых.

Воспитай чада моя, да уподобятся мужу мудру, иже основа дом свой на камени; воспитай чада моя, да, якоже девы мудрыя, не угасят светильники своя.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 3

Сила Вышняго да осенит чада моя Твоего ради неусыпнаго предстательства пред Сыном Твоим, сего ради, познавша Твое Матернее милосердие ко всем, с верою к Богу притекающим, да воззовут к Нему: Аллилуиа.

Икос 3

Имущи от Бога чада моя, не хощу узрети их в муце вечней, но паче в Книзе Живота написанных и живот вечный наследящих. Сего ради, Пречистая, приклони ухо Твое к молению рабы Твоея, взывающия:

Воспитай чада моя, во еже избегнути им вечных мук; воспитай чада моя, во еже наследовати им живот вечный.

Воспитай чада моя, во еже тещи им путь жития своего в покаянии; воспитай чада моя в надежде на милосердие Божие.

Воспитай чада моя в трудех стяжающа благодать Духа Святаго; воспитай чада моя употребляюща усилие восхитити Царствие Небесное.

Воспитай чада моя, во еже написатися им в Книзе Животней; воспитай чада моя, да на Страшнем Судищи Сына Твоего одесную поставлена будут.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 4

Бурю внутрь имущи помышлений сумнительных и хотящи чадом моим живот вечный наследити, со слезами молю Тя, Мати Божия, и во уповании и умилении сердца пою Сыну Твоему: Аллилуиа.

Икос 4

Слышащи глас Твой, глаголющий Сыну Твоему: Ихже дал еси Ми в удел, во веки сохраняй,— простираю руце мои и сердце к Твоему милосердию, да сотвориши чада моя рабы Твоя и вонмеши прошением моим таковым:

Воспитай чада моя, приимши я в удел Твой избранный; воспитай чада моя ищуща помощи у Тебе единыя.

Воспитай чада моя, да бегают грехов, ведущих в погибель; воспитай чада моя, да обрящут путь покаяния.

Воспитай чада моя входяща тесными враты заповедей Сына Твоего во Иерусалим горний; воспитай чада моя, да отверзутся им двери райския.

Воспитай чада моя, во еже вселитися им со всеми святыми; воспитай чада моя, во еже восприяти им живот вечный.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 5

Свет невечерний, сиречь Сын Твой, Пресвятая Дево, да возсияет в сердцах чад моих, во еже ощутити им сладость небесную еще на земли и воззвати Богу: Аллилуиа.

Икос 5

Видящи мое прилежное моление, во славу Твою возносимое, аки фимиам благовонный, не отврати лица Твоего от моих чад, аще оная отвратятся Тебе, но паче услыши глаголы уст моих, вопиющих Ти:

Воспитай чада моя нища духом, яко тех есть Царство Небесное; воспитай чада моя плачуща, яко тии утешатся.

Воспитай чада моя кротка, яко тии наследят землю; воспитай чада моя алчуща и жаждуща правды, яко тии насытятся.

Воспитай чада моя милостива, яко тии помиловани будут; воспитай чада моя чиста сердцем, яко тии Бога узрят.

Воспитай чада моя миротворцы, яко тии сынове Божии нарекутся; воспитай чада моя подвизающася правды ради, да наследят Царство Небесное.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 6

Проповедует весь мир христианский всегдашнее заступление Твое сирот, вдовиц и матерей, о чадех своих молящих и вопиющих Богу: Аллилуиа.

Икос 6

Возсиявый лучами благодати Божия в душах чад моих свет небесный да озарит им путь, ведущий в живот вечный, и да последуют по нему, осеняемая Твоим всемогущим покровом, в Церковь Сына Твоего, с неюже зову Тебе сице:

Воспитай чада моя, просвещающи я светом Сына Твоего; воспитай чада моя, да во свете Его узрят Свет и направят стопы своя к Нему.

Воспитай чада моя, да будут свет миру и да светит свет их пред людьми; воспитай чада моя, да вси, видяще их добрая дела, прославят Отца Небеснаго.

Воспитай чада моя любяща Тя и Сына Твоего не токмо умом, но и сердцем; воспитай чада моя выну обращающа очи сердца своего к Создателю всяческих.

Воспитай чада моя, во еже ходити им непорочне в законе Господни; воспитай чада моя, во еже быти им верным чадом Матере Церкве.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 7

Хотящи чадом моим вечнаго спасения, со слезами предстою пред честною Твоею иконою, Владычице, да не презриши моления моего и мене, к Сыну Твоему взывающия: Аллилуиа.

Икос 7

Дивными и неизследимыми судьбами Сына Твоего привлецы чада моя милостивною рукою под Свой благодатный покров, да со усердием зову Ти:

Воспитай чада моя ищуща прежде Царствия Божия и правды Его; воспитай чада моя, да обрящут безценную жемчужину и оставят прочая.

Воспитай чада моя, да в мори житейстем не останутся кроме окормления; воспитай чада моя, во еже быти им в малем числе избранных Твоих.

Воспитай чада моя на всяком месте творяща волю Отца Небеснаго; воспитай чада моя, да последуют стопам Сына Божия.

Воспитай чада моя не глаголюща, ниже помышляюща хулы на Духа Святаго; воспитай чада моя, во еже чтити им Тя, рождшую Спаса душ наших.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 8

Странствующа в юдоли сей земней и многомятежней, чада моя где обретут отраду и утешение, аще не в Тебе, Пречистая? Спутешествуй же им и настави их на путь истинный, да зовут Богу: Аллилуиа.

Икос 8

Всем еси Мати милующая Ты, Владычице, и хощу, да пребудеши Таковая и чадом моим. Се, вручаю их Тебе и, воспомянувши милости Твоя пребогатыя, во смирении молю Тя:

Воспитай чада моя во умилении младенчестем, яко таковых есть Царствие Божие; воспитай чада моя, да будут меньша всех, обаче велика пред Богом.

Воспитай чада моя милосердна, якоже милосерд Отец наш Небесный; воспитай чада моя, да памятуют, яко Той и грешныя милует.

Воспитай чада моя любяща и молящася о вразех своих; воспитай чада моя гнушающася врагов Божиих.

Воспитай чада моя верны сыны Отечества земнаго; воспитай чада моя благонадежны гражданы Царства Небеснаго.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 9

Всякаго добра души и сердца их исполняющи, отжени от них духа злосмраднаго безбожия, подающи от щедрот Твоих всем и коемуждо по потребе, да зовут Богу: Аллилуиа.

Икос 9

Витий суемудренных общения, глаголющих лжу на Твое всемощное заступление, избави их и призри на мя, верно вопиющую:

Воспитай чада моя зело противящася безбожником; воспитай чада моя крепко стояща противу богоненавистных учений.

Воспитай чада моя не приемлюща духа сынов противления; воспитай чада моя бодрствующа и молящася, да не впадут во искушение.

Воспитай чада моя бегающа утех мирских и прелести мира сего; воспитай чада моя уклоняющася от зла и творяща благо.

Воспитай чада моя имеюща уши отверста, во еже слышати глас Божий; воспитай чада моя соблюдающа Слово Божие, причастники блаженства райскаго их содевающи.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 10

Спасти хотя мир, Сын Твой сниде с Небесе призвати не праведныя, но грешныя на покаяние. Сего ради моли Сына Твоего о чадех моих, да спасенная Тобою, воззовут Богу: Аллилуиа.

Икос 10

Стена несокрушимая буди, Царице Небесная, чадом моим, да под Твоим благодатным покровом возмогут содеяти множество благих дел, сего ради зову Ти сице:

Воспитай чада моя в чистоте непорочней; воспитай чада моя ведуща творити волю Сына Твоего.

Воспитай чада моя ненавидяща грех и всякое беззаконие; воспитай чада моя любяща добро и всяческую добродетель.

Воспитай чада моя служаща Богу нашему в послушании и целомудрии; воспитай чада моя обращающа в бедах очеса своя к Твоему милосердию.

Воспитай чада моя, яко скорая Помощница еси всем с верою к Тебе притекающим; воспитай чада моя, яко не имам иныя помощи, ни иныя надежды.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 11

Пети Твое необоримое заступление выну сподоби чада моя, Владычице, и Твоею благодатию отверзи уста их вопияти Богу: Аллилуиа.

Икос 11

Светоприемную свещу свыше, истаявающую день и нощь от любве к Тебе и Сыну Твоему и ближнему, живот их сотвори и не презри мене, зовущую Ти:

Воспитай чада моя выну взирающа на Крест и страдания Спасителя нашего; воспитай чада моя имеюща очи видети страждущих окрест себе.

Воспитай чада моя, да памятуют слова апостола: Друг друга тяготы носите; воспитай чада моя, да будут якоже милосердный самарянин.

Воспитай чада моя труждающася в винограднице, яко добрии раби; воспитай чада моя в чаянии пришествия Сына Твоего.

Воспитай чада моя в непрестанней молитве и трезвении; воспитай чада моя выну предстояща Тебе в благоговении.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 12

Благодатию неизреченною Духа Святаго напитай сердца чад моих, во еже возлюбити им Сына Твоего и Бога нашего и Тебе, Преблагая, да зовут Царю всяческих: Аллилуиа.

Икос 12

Воспевающи милосердие Твое, имже милуеши и питаеши чада моя, вопию Ти, да не престанеши молити о них Сына Твоего, верую бо: вся Ты можеши, и да исполниши моления моя таковая:

Воспитай чада моя исполнена Духа Святаго; воспитай чада моя Того благодатию твердо на вернем пути пребывающа.

Воспитай чада моя, путеводствующи их Звездою утреннею, Яже есть Сын Твой, в обители праведников; воспитай чада моя, во еже вселитися им в дому Отца Небеснаго.

Воспитай чада моя кротка, молчалива и трепещуща словес Божиих; воспитай чада моя отверзающа уста своя токмо к прославлению благости Творца всяческих.

Воспитай чада моя, во еже чтити им отца и матерь своих, по заповеди; воспитай чада моя, да уподоблюся и аз смоковнице, добрый плод приносящей.

Воспитай, Владычице, чада моя достойна Небеснаго Царствия и наследники вечных благ сотвори я.

Кондак 13

О Всепетая Мати Иисуса Сладчайшаго! Приими сие малое акафистное моление о чадех моих, возьми я под Твой благодатный покров, даруй им мыслити, глаголати и творити яже к Тебе и Сыну Твоему влекущая и посли им в житии сем привременнем вся, яже ко спасению душ их наставляющая, да выну зовут Богу: Аллилуиа.

Этот кондак читается трижды, затем 1-й икос «Ангела с Небесе…» и 1-й кондак «Взбранной Воеводе…».

Молитва ко Господу Иисусу Христу

Сладчайший Иисусе, Боже сердца моего! Ты даровал еси мне детей по плоти, обаче души их Твоя суть, яко Ты искупил еси ны Твоею неоцененною Кровию. Сего ради умоляю Тебе, Сладчайший мой Спасителю: благодатию Твоею прикоснися сердцам детей моих (имена) и крестников моих (имена), огради их страхом Твоим Божественным, удержи от дурных наклонностей и привычек, направи на путь истины, добра и красоты, устрой жизнь их, якоже Ты Сам хощеши, и спаси души их, имиже веси судьбами. Аминь.

Молитва к Божией Матери

О Пресвятая Владычице Дево Богородице, спаси и сохрани под кровом Твоим чад моих (имена их), всех отроков, отроковиц и младенцев, крещеных и безымянных и во чреве матере носимых. Покрый их ризою Твоего Материнства, соблюди их во страсе Божием и в послушании родителем, умоли Сына Твоего и Господа нашего, да дарует им полезная ко спасению их. Вручаю их Матернему смотрению Твоему, яко Ты еси Божественный покров рабом Твоим. Аминь.

Молитва ко Господу Иисусу Христу преподобнаго Амвросия Оптинскаго

Господи, Ты Един вся веси, вся можеши и всем хощеши спастися и в разум Истины прийти. Вразуми чадо мое (имя) познанием истины Твоея и воли Твоея святыя, укрепи его ходити по заповедей Твоим и мене грешнаго помилуй, молитвами Пречистыя Матере Твоея, Богородицы и Приснодевы Марии, и святых Твоих (перегисляются все святые покровители семьи), яко препрославлен еси со Безначальным Твоим Отцем и с Пресвятым и Благим и Животворящим Твоим Духом, ныне и присно, и во веки веков. Аминь.

Иная молитва ко Господу Иисусу Христу преподобнаго Амвросия Оптинскаго

Милосердый Господи, Иисусе Христе, Тебе вручаю чадо мое, яже Ты даровал еси мне, исполни моление мое.

Прошу Тебе, Господи, спаси его путями, яже Ты Сам знаеши. Сохрани его от пороков, зла, гордости, и да не коснется души его ничто противное Тебе. Но веру, любовь и надежду на спасение даруй ему, и да будет свят и непорочен пред Богом его жизненный путь.

Благослови его, Господи, да стремится чадо мое во всякую минуту жизни своея исполняти святую волю Твою, дабы Ты, Господи, возмогл еси всегда пребывати с ним Духом Твоим Святым. Господи, научи его молитися Тебе, дабы молитва была ему опорою, отрадою в скорбех и утешением жизни и дабы молитвою его спасалися и мы, его родители.

Ангели Твои да хранят его всегда.

Да будет чадо мое чутко к горю ближних своих и да исполнит Твою заповедь любве. И аще согрешит, то сподоби его, Господи, принести покаяние, и Ты, по Своей неизреченней милости, прости его. Егда же скончается жизнь его земная, возьми его в Своя небесныя обители. Аминь.

Молитва к Ангелу Хранителю

Святый Ангеле Хранителю моего чада (имя), покрый его твоим покровом от стрел демона, от глаз обольстителя и сохрани его сердце в ангельстей чистоте. Аминь.